
那洛巴大师教言集NARO32བཀའ་སྲུང་དུད་སྲོལ་ལྷ་མོའི་ཤོག་རིལ།
1-4-60a

༄༅། །བཀའ་སྲུང་དུད་སྲོལ་ལྷ་མོའི་ཤོག་རིལ།
༄༅། །བཀའ་བསྲུང་(སྲུང་)དུད་སྲོལ་ལྷ་མོའི་ཤོག་རིལ་བཞུགས་སོ། །རྒྱ་གར་སྐད་དུ། ཤྲི་ཡ་དེ་བི་མཧཱ་ཀ་ལ་ས་དྷ་ནོ་པི་ཀ །བོད་སྐད་དུ། དཔལ་ནག་
མོ་ཆེན་མོ་ལ་ཕྱག་འཚལ་ལོ། །དཔལ་ནག་མོ་བསྒྲུབ་པར་འདོད་པའི་རྣལ་འབྱོར་པས། གནས་ཡིད་དང་འཐུན་པར་ཡོ་བྱད་ཕུན་སུམ་ཚོགས་པ་དང་ལྡན་པར་བཤམས་ལ། དེ་ནས་གནས་དུར་ཁྲོད་
1-4-60b

དམ། ཤིང་གཅིག་གི་དྲུང་ངམ། ཅོང་རོང་ངམ། ཁང་སྟོང་ངམ། དབེན་པའི་གནས་སུ་ཕྱིན་ལ། དེ་ནས་དང་པོ་ཕྱོགས་སྐྱོང་བཅུ་ལ་སོགས་པའི་འཇིག་རྟེན་པའི་ལྷ་འདྲེ་ཐམས་ཅད་ལ་གཏོར་མ་སྦྱིན་
ཞིང་། གསེར་སྐྱེམས་རྒྱས་པར་ཡང་བཏང་ངོ་། །དེ་ནས་ཨེའི་མཎྜལ་ལ་ཀུན་དུ་(ཏུ་)ཁྲུ་རེས། དཔངས་སུ་ཡང་ཁྲུ་གང་གི་ཚད་དུ་བྱའོ། །དེ་ལ་སྟེགས་བུ་སུམ་རིམ་དུ་བྱ། བར་པ་ལ་ཟླ་ཁམ་གསུམ་
དུ་བྱ། ཐ་མ་ལ་གྲུ་གསུམ་དུ་བྱ། ཐ་མའི་གྲུ་གསུམ་རེ་རེ་ལ་རབས་ཆད་ཀྱི་ཐོད་པའམ། ཡང་ན་གང་ཡང་རུང་པའི་ཐོད་པ་རེ་རེ་བཞུགས་སྟེ(ཏེ)། དེ་ཡང་ཐོད་པའི་སྟེང་མི་མངོན་པར་བྱས་ལ། ཐོད་པའི་ནང་
དུ་ཐོད་ཆུང་ཁ་སྦུབ་པ་གཤིན་རྗེའི་གྲོང་ཁྱེར་ཡིན་པས། ཡང་གཤིན་རྗེ་མ་མོ་ཐོད་པའི་ནང་དུ། ཡི་གེ་ཡ་ནག་པོ་རེ་རེ་རྡོ་སོལ་གྱིས་བྲིའོ། །ཐོད་པའི་ཕྱི་ལ་ཡི་གེ་མ་དམར་པོ་རེ་རེ་མི་ཁྲག་གིས་
བྲིའོ། །ཟླ་ཁམ་གསུམ་ཡང་དམར་པོར་བྱང་ཆུབ། གྲུ་གསུམ་དང་པོར་མཚོན་དང་པོར་ཚོན་བཏང་སྟེ། མ་ལེགས་ན་ཡ་འདི་ལྟ་བུའི་སྐྱོན་ཡོད་དེ། ཚོན་སྦོམ་ན་སློབ་དཔོན་སློབ་བུ་ལ་ནད་མང་དུ་འོང་ངོ་། །
ཚོན་ཕྲས་ན་ནོར་ཡལ་བ་འོང་། ཡ་ཡོར་གྱུར་ན་ཡུལ་དུ་འཁྲུག་པ་ཡོང་ངོ་། །བར་ཆད་པར་གྱུར་ན་སློབ་དཔོན་སློབ་མ་མྱུར་དུ་འཆི་བར་འགྱུར། དེ་བས་རེ་ཁ་སྨྱུག་མ་འབྲིང་པོའི་ཚད་ཙམ་དུ་བྱས་ལ། 
1-4-61a

གཡས་ནས་བསྐོར་ཞིང་བྲི་སྟེ། ཚོན་དགྱེ་བ་ཡང་གྲུ་གསུམ་ཉིས་འགྱུར་དུ་དགྱེས་སྟེ(ཏེ)། ནང་གི་གྲུ་གསུམ་ནག་པོར་བྱ། ཕྱིའི་གྲུ་གསུམ་དམར་པོར་བྱ། ནང་
གི་གྲུ་གསུམ་གྱི་རྩེ་མོ་རེ་རེ་ལ། རྡོ་རྗེ་ཕྱེད་མེད་རེ་རེས་མཚན་པར་བྲི། ཐལ་ཆེན་དང་ཁྲག་སྐམ་བསྲེས་པས་ཨེའི་དབུས་སུ་སྔགས་ཀྱི་ས་བོན་ཡི་གེ་ཧཱུཾ་བྲི། ནང་གི་ཟུར་གསུམ་ལ་མ་མོ་ཐམས་ཅད་
ཀྱི་སྲོག་གི་སྙིང་པོ་ཕུལ་བ་ཡི་གེ་བྷྱོ་རེ་རེ་བྲི་བར་བྱའོ། །དེ་ན་དུ་དུ་རའི་ཁུ་བས། དུར་ཁྲོད་ཀྱི་བོལ་བ་དང་། ར་རོག་པོའི་ཁྲག་དང་། བྱ་ནག་མོའི་ཁྲག་དང་། དེ་དག་ཆ་མཉམ་ནས་བསྲེས་ལ། ཞིབ་དུ་(ཏུ་)བཏགས་
པ་ཚོ་རྩི་དང་སྦྱར་བས། དུར་ཁྲོད་ཀྱི་རས་ལ་དཔལ་ལྷ་མོའི་སྐུ་བྲིས་ལ། ཨེའི་མཎྜལ་གྱི་དབུས་སུ་བཞུགས་སུ་གསོལ་ཏེ། དེ་ནས་སྤོས་ལ་སོགས་པ་མཆོད་པའི་ཡོ་བྱད་ལྔ་ཚང་བར་བསོགས་ལ་མཆོད་
པ་དབུལ་ཏེ། དེ་ཡང་དང་པོ་བདག་དམ་ཚིག་གི་ལྷ་མོར་བསྒོམས་སྟེ(ཏེ)། དང་པོར་རྣལ་འབྱོར་པའི་སྙིང་ཁའི་དབུས་སུ་པདྨ་འདབ་མ་བཞི་པའམ། ཡང་ན་འདབ་མ་བརྒྱད་པ་སྙིང་པོ་དང་བཅས་པ་གཅིག་
བསམ། པདྨ་དེའི་སྙིང་པོའི་དབུས་སུ། ཡི་གེ་ཨཾ་ཀླད་སྐོར་དང་བཅས་པ་ལ་འོད་འཕྲོ་བ་གཅིག་བསམ། [བེར་ཡང་བཾ་དཀར་པོ་ལ་བྱ་དེའི་སྟེང་དུ་རམ་དམར་པོ། དེའི་སྟེང་དུ་ཧཱུཾ་ན་ད་དང་བཅས་པ། ན་ད་ལ་འོད་འཕྲོས་པས། ཧཱུཾ་
1-4-61b

དམར་པོར་བསྒྱུར་ཏེ། རིམ་གྱིས་མེས་བསྐུལ་ནས་རིམ་གྱིས་མེས་བསྲེག་པར་བསམ། ཡང་ན་དཀྱུས་ལྟར་བྱས་ཡང་མི་འགལ། ཡང་སྔར་རྣམ་སྨིན་ཙམ་གྱི་ཨཾ་དེ་ཐལ་བའི་སཾ་གྱུར་པ་ལས། བུམ་པ་དཀར་པོ་བདུད་རྩིས་གང་བ་དེ་ལས་རྒྱུན་བབས། བརྟན་
ཞིང་བརྡས་པར་གྱུར་པ་ལས། ཟླ་བ་ལ་སོགས་པ་ཡང་སྦྱར་རོ། །]མེ་དེས་བདག་གི་རྣམ་པར་རྟོག་པ་ཅན་གྱི་ལུས་བསྲེགས་ཐལ་བར་གྱུར་པར་བསམ། དེ་ནས་ཡང་ཐལ་བ་དེའི་དབུས་སུ་ཞི་བའི་ཡིད་ཀྱིས་བསམ་པར་+བྱ་+
བྱ་བ། སྔོན་གྱི་པདྨའི་སྙིང་པོ་ལ་གནས་པ་སྲོག་གི་རང་བཞིན་ཡི་གེ་ཨཾ། དེའི་དབུས་སུ་ཡི་གེ་བཾ་བསམ་མོ། །དེ་ནས་བཾ་དེ་ཡོངས་སུ་གྱུར་པ་ལས་བུམ་པ་དཀར་པོ་ཁ་ནས་བདུད་རྩིའི་ཆུ་རྒྱུན་འབབ་པ་གཅིག་ཏུ་
བསམ། དེ་ནས་སྔོན་གྱི་སྲོག་དུ་(ཏུ་)བཤད་པའི་ཡི་གེ་ཨཾ་དེ་ལས་བདུད་རྩིའི་རྒྱུན་བབ་ཅིང་སྦྲེང་པས། ཡི་གེ་ཀུན་གྱི་མཆོག་སྲོག་ཏུ་བཤད་པའི་ཨཾ་ཅེས་(ཞེས་)པ། ཆུ་དེས་ལྷག་པར་ཡང་བརྟན་ཞིང་བརྟས་པར་བྱས་ནས་
གཟི་བརྗིད་དང་ལྡན་པར་གྱུར་ནས། ཟླ་བ་དང་ཁ་བ་དང་འོ་མ་དང་ཀུ་ཏ་དང་སྤྲིན་དཀར་པོ་དང་དུང་ལྟར་བསམ་པར་བྱ་སྟེ། དེ་ནས་དཔལ་ལྷ་མོའི་མཚན་གྱི་སྔགས། ཨོཾ་མ་ཧཱ་ཀ་ལ་དེ་བི་ཀ་ར་ལི། བི་གྲིན་ཏེ། ཀཱ་
ལ་ར་ཏྲི། ཙན་ཌ་རུ་པི་ནི་ཧཱུཾ་ཕཊ། ཅེས་བརྗོད་པའི་སྒོ་ནས་སྔགས་ཀྱི་ས་བོན་ཨོཾ་དེ་ལས་ལྷར་བསྒྲུབས་ཏེ། དཔལ་ལྷ་མོ་ཆེན་མོའི་སྐུར་བསྒྱུར་ཞིང་བསྒོམ་པར་བྱ་བ་ནི། སྐུ་མདོག་ནག་མོ། ནག་པོའི་སྤྲིན་དང་
1-4-62a

བུང་བ་ལྟར་གནག་པ། ཤིན་དུ་(ཏུ་)རྦེག་པ། ཀེང་རུས་ཀྱི་ལུས་ཅན། ཞལ་གཅིག་ཕྱག་བཞི་ཞབས་གཉིས་པ། གཡས་ཀྱི་དང་པོ་ན་རལ་གྲི། འོག་མ་ན་བྷན་དྷ་དམར་གྱིས་བསྐྱིལ་བ།
ཁ་འཁྲོལ་བ། གཡོན་གྱི་དང་པོའི་ཕྱག་ན་ཤཀ་ཏི། འོག་མ་ན་ཏྲི་ཤུ་ལའི་མགུལ་ན་དར་དཔྱངས་འཕྱར་བ་ཐོགས་པ། མི་རོ་རངས་པ་ཁར་བཅུག་ནས་མཆེ་བ་བཞི་བརྩིགས་པ། སྤྱན་གསུམ་དམར་
པོ་བཟློག་ནས་བལྟ་བ། དབུ་སྐྲ་རལ་པ་གྱེན་དུ་བརྫེས་ཤིང་། ལན་བུ་གཡོན་དུ་འཁྱིལ་བ། དབུ་སྐྲ་ལ་སྦྲུལ་དང་ཐོད་ཕྲེང་གིས་བརྒྱན་པ། སྙན་ཆ་གཡས་ན་སྦྲུལ་གྱི་མགུལ་ན་དྲིལ་བུ་བསིལ་བ། སྙན་
ཆ་གཡོན་ན་སེངྒེའི་རལ་པ་དམར་བ། རྣ་ལྟག་གཉིས་ན་དར་ནག་གི་ཅོད་པཎ་འཕུར་བ། ལྷ་མ་ཡིན་ལ་སོགས་པའི་ཐོད་བས་དོ་ཤལ་དུ་བྱས་པ། གླང་པོ་ཆེའི་ཀོ་རློན་གྱིས་སྟོད་གཡོགས་སུ་བྱས་པ། བ་
གླང་གི་ཀོ་རློན་ཆེན་པོ་དྲས་པ་ལ་རེ་ལྡེ་སེར་བསོ་ཤམ་བུར་བཏགས་པས་སྐུ་སྨད་དཀྲིས་པ། ཁྲག་དང་ཞག་གི་ཐིག་ལེས་དུམ་བུར་བྲིས་པ། ཀླུའི་རྒྱལ་པོ་བཤིབས་པས་སྐེ་རགས་བྱས་པ། +ཞབས་+
ཞབས་གཉིས་ལྕགས་སྒྲོགས་(སྒྲོག་)གིས་བརྒྱན་ནས་ཁོང་བུ་ག་པའི་སྟེང་ན་བཙན་དཀྱིལ་དུ་བཞུགས་པ་དུར་ཁྲོད་ཀྱི་ཆས་བརྒྱད་ཀྱི་དབུས་ན་རྐང་དུང་དང་འབྲུག་གི་སྒྲ་ལྟར་དུ་སྒྲོགས་ཤིང་། མ་མོ་དང་མཁའ་
1-4-62b

འགྲོ་དང་ཤ་ཟ་ཐམས་ཅད་དབང་དུ་བསྡུད་པ་གཅིག་ཏུ་བསྒོམ། དེ་ལྟར་གསལ་བ་དང་། དེའི་སྙིང་གའི་དབུས་སུ་བྷྱོ་མར་མེ་དང་འདྲ་བ་སོར་བཞིའི་ཚད་ཙམ། དབྱིབས་སྒོང་(སྒོ་)ངའི་གཟུགས་དང་འདྲ་བ་
གཅིག་གསལ་བར་བསྒོམ་མོ། །སྒོང་(སྒོ་)ང་དེའི་ནང་གི་དབུས་སུ་ཧཱུཾ་ཉི་མ་དང་ཟླ་བའི་དཀྱིལ་འཁོར་དུ་ལྡེམས་པ་གཅིག་བསམ། དེ་ཡང་ཧཱུཾ་གི་ཐིག་ལེ་ནི། ཉི་མའི་དཀྱིལ་འཁོར་དུ་བསམ། ཧཱུཾ་གི་ཟླ་ཚེས་
ནི་ཟླ་བའི་དཀྱིལ་འཁོར་དུ་བསམ། དེའི་འོག་ཏུ་ཧཱུཾ་དེ་ལས་འོད་ཟེར་བྱུང་པས། བཟླས་པའི་ཡིག་འབྲུ་རྣམས་ཀྱི་ཕྲེང་པར་གྱུར་ནས། ཧཱུཾ་དེ་ཉིད་ཀྱི་མཐའ་མར་བསྐོར་བར་བསྒོམ་ཞིང་། ཧཱུཾ་དེ་ཉིད་
ལ་བལྟ་ཞིང་གསལ་བ་དང་། འདྲིས་ཤིང་གོམས་པའི་སྦྱོར་བས་རྩེ་གཅིག་པ་ཁོ་ནར་བསྒོམ་མོ། །དེ་ལྟར་བདག་དམ་ཚིག་གི་ལྷ་[ཡིག་ཆུང་སྔགས་ཀྱི་སྙིང་ཁ་ནས་བྷ་ག་ལ་བསྟིམ་པ་གསང་བའི་ལྷ་མོ་ཟེར། ལ་
ལ་སྐུར་སྟོན་ནས་བསྟིམ་པ་ཡང་ཟེར་རོ། །]མོར་གསལ་བ་དང་། གྲུབ་པའི་གནས་ནས་རང་བཞིན་གྱི་ལྷ་མོ་སྔོན་གྱི་དང་འདྲ་བ་ཞིག །འཁོར་མ་མོ་གཅེར་བུ་ལ་རལ་པ་ཅན། ཐོད་པས་སེ་རལ་ཁར་བརྒྱན་པ། ལག་
པ་གཡས་པ་ན་མིའི་སྙིང་ཐོགས་པ། ལག་པ་གཡོན་པ་ན་བྷན་དྷ་རཀྟས་བཀང་པ་འཛིན་པ། སྙིང་གི་དབུས་ན་སྲོག་གི་སྙིང་པོ་ཡི་གེ་བྷྱོ་རེ་རེ་ཡོད་པ་བསམ་གྱིས་མི་ཁྱབ་པ་དང་བཅས་ཏེ་བྱོན་
1-4-63a

པར་བསམ་མོ། །དེ་ལྟར་ནམ་མཁའ་ལ་སྤྱན་དྲངས་ནས། མདུན་གྱི་ཨེའི་དབུས་ཀྱི་སྔགས་ཀྱི་ས་བོན་ཧཱུཾ་དང་བྷྱོ་ལ་སོ་སོར་ཐིམ་པ་ལས་སྐུ་ཕྱག་རྒྱར་བཞེངས་པར་བྱའོ། །
དེ་ཡང་དགུག་པ་དང་གཞུག་པ་དང་། བཅིངས་པ་དང་དབང་དུ་བྱ་བའི་སྔགས་འདིས་བྱའོ། །ཏྲི་ཤ་ཛ་ཧཱུཾ་བཾ་ཧོ་ས་མ་ཡ་སྟཾ། ས་མ་ཡ་ཧོཿཞེས་བརྗོད་ནས། དེ་ནས་གཟུགས་མངོན་སུམ་པར་སྟོན་
གཅིག་པར་བསྒོའོ། །དེ་ལྟར་མི་སྟོན་ན། ཨོཾ་ཧཱུཾ་བྷྱོ་ཨེ་ཨ་ར་ལི་ཧྲི་ཛཿཞེས་སྔགས་དེ་བརྗོད་ཅིང་གཟིར་རོ། །མངོན་སུམ་དུ་མ་བྱུང་ན་ཡང་། ངའི་སེམས་ལ་ཅི་འདོད་པ་དེ་ནི་ཁྱོད་ཀྱིས་གྲུབ་པར་གྱིས་
ཤིག་པར་བསྒོའོ། །དེ་ཡང་ལས་བྱེད་པའི་ཚེ། རིགས་ཀྱི་དམ་ཚིག་སྦྱིན་ཏེ་དམ་ཚིག་ཀྱང་གུར་གུམ་གྱི་ཆུ་ལ་སྔགས་ཀྱིས་བཏབ་ལ་སྦྱིན་ནོ། །དམ་ཚིག་+སྔགས་ནི་+སྔགས་ནི་འདིའོ། །ཨོཾ་ཧ་ན་ཧ་ན་
བཛྲ་ས་མ་ཡ་མི་ཏ་ཀྲ་མ་ནན་ཧཱུཾ་ཛཿ དམ་ཚིག་ཆུ་སྦྱིན་ནས་བསྒོ་བ། ལྷ་མོ་ཁྱོད་དམ་ཚིག་འདི་ལས་འདས་ནས་བསྒོ་བ་བཞིན་དུ་མ་བྱས་ཀྱི་བར་དུ་གཟིར་བ་ཆེན་པོ་བྱེད་པ་དང་། དམ་ཚིག་གི་དུག་ཆུ་
འདི་ཡང་དུག་ཧ་ལ་ཧ་ལ་ཆེན་པོར་གྱུར་ཏེ། མཐོང་བས་ཁྲག་ཏུ་སྐྱུག་པ་དང་། རྡོ་རྗེ་ཟ་བྱེད་ཆེན་པོས་སྙིང་དྲལ་ཏེ་དུས་མ་ཡིན་པར་འཆི་བར་འགྱུར་བ་དང་། གནོད་སྦྱིན་གྱིས་གསོད་པར་འགྱུར་བ་
1-4-63b

དང་། སྙིང་འགས་པ་དང་། ཁྲོ་བོ་ཟ་བྱེད་ཆེན་པོ་དང་། འཇིགས་བྱེད་ཆེན་པོར་གྱུར་ཏེ། མེ་དབལ་རྡོ་རྗེ་འབར་བས་ཚིག་ནས་ལུས་ཐལ་བར་བྱས་ཏེ། སོ་སོ་རང་རང་གི་མནའ་བོར་བ་བཞིན་དུ་དམྱལ་བ་ངུ་
འབོད་སྒྲོགས་སུ་སྐྱེ་བར་འགྱུར་རོ། །ཞེས་དམ་ཚིག་བོར་རོ། །དེ་ནས་དཔལ་ལྷ་མོ་ལ་མཆོད་པ་ལྔ་དང་གཏོར་མ་ལྔ་དབུལ་ཏེ། ཨོཾ་ཧཱུཾ་ཤྲི་ཡ་དེ་བི་ཀ་ལི་མ་ཧཱ་ཀ་ལི་ཧཱུཾ་བྷྱོཿ དབུ་ལ་དབུལ་ལོ། །ཨོཾ་བཛྲ་དྷུ་པ་
པཱུ་ཛ་མེ་ག་ས་མུད་ཏྲ་སྥ་ར་ཎ་ས་མ་ཡེ་ཧཱུ་ཾ་ཕཊ་ཅེས་བདུག་སྤོས་ཤངས་ལ་དབུལ་ལོ། །མར་མེས་སྤྱན་ལ་དབུལ་ལ་༴ གན་དྷེས་༴ དྲི་ཆབ་ཐུགས་ཀར་༴ ཨོཾ་བཛྲ་ནེ་ཝི་ཏེ་པཱུ་ཛ་མེ་ག་ས་མུད་ཏྲ་སྥ་ར་ཎ་ས་མ་
ཡེ་ཧཱུཾ་ཕཊ། ཅེས་བརྗོད་དེ་ལྷ་བཤོས་ཕྱག་དུ་(ཏུ་)དབུལ་ལོ། །དེ་ནས་ར་རོག་པོའི་ཤ་ཁྲག་དང་། བྱ་ནག་མོའི་ཤ་ཁྲག་དང་། གཞན་གྱི་ཡང་ཤ་ཁྲག་སྣ་ཚོགས་གང་འབྱོར་དང་། ཆང་ལ་སོགས་པ་
བཟའ་བ་སྣ་ཚོགས་དང་ལྡན་པའི་གཏོར་མ་དབུལ་བར་བྱ་སྟེ། མཧཱ་མཾ་ས་མ་ཡ་ཁ་ཧི། མཧཱ་གོ་རོ་ཙ་ན་ཁ་ཧི། མཧཱ་སུརྱ་ཁ་ཧི། ཨི་དཾ་བྷ་ལིཾ་གྷྲཱི་ནྣ་གྷྲཱི་ནྣ་པ་ལ་ཧཱུཾ་ཕཊ་སྭཱཧཱ། ཅེས་(ཞེས་)བརྗོད་དེ་གཏོར་མ་དབུལ་
བར་བྱའོ། །དེ་ལྟར་མཆོད་པ་རྫོགས་པར་ཕུལ་ནས་བསྟོད་དེ་གླིང་བུའམ། མི་རྐང་བུད། ཅང་ཏེའུ་འམ། མི་ཐོད་ཀྱི་རྔ་བརྡུང་ཞིང་། དབྱངས་སྙན་པས་བསྟོད་པ་བྱ་སྟེ། ཨོཾ་དཔལ་ལྡན་ལྷ་མོ་མི་
1-4-64a

ཕམ་སྲིད་གསུམ་བདག །རང་དོན་བསྒྲུབ་ཕྱིར་རྣམ་ཐར་ལ་གཞོམ་ཀྱང་། །སྙིང་རྗེའི་དབང་གིས་རྗེས་ལ་ཐོབ་པ་ཡིས། །ཤེས་རབ་སྣ་ཚོགས་དག་གིས་འཕྲོ་དོན་བྱེད། །ལྷ་
མོ་སྐུ་མདོག་ནག་མོ་ཆར་སྤྲིན་མདོག །མཚན་མོ་ནག་མོ་ཤིན་དུ་(ཏུ་)གཏུམ་པའི་གཟུགས། །ཤིན་དུ་(ཏུ་)རྦེག་ཅིང་ཀེང་རུས་གཟུགས་ཅན་མ། །ཞལ་གཅིག་ཕྱག་བཞི་ཞབས་གཉིས་བརྗིད་པའི་སྐུ། །རལ་
པ་གྱེན་འགྲེང་ལན་བུ་གཡོན་དུ་འཁྱིལ། །སྐྲ་སྐེད་སྦྲུལ་ལ་ཐོད་པའི་ཕྲེང་ཐོད་ཅན། །རྣ་ལྟག་མེ་ཏོག་དར་ནག་ཅོད་པན་ཅན། །ཁྲག་གི་ཆང་གིས་ར་རོ་སྤྱན་གསུམ་དམར། །མི་རོ་རེངས་པ་ཁར་བཅུག་མཆེ་
བ་བཞི། །རྣམ་པར་གཙིགས་ནས་ཁྲག་ལ་ཤིན་དུ་(ཏུ་)དགྱེས། །སྙན་གཡས་སྦྲུལ་གྱི་མགུལ་ནས་དྲིལ་བསིལ་ཞིང་། །གདུག་པ་བཏུལ་ནས་ཚངས་པའི་སྒྲ་སྒྲོགས་མ། །སྙན་ཆ་གཡོན་པ་སེངྒེའི་རལ་
པ་དམར། །དཔའ་བོ་ཁམས་གསུམ་སེངྒེའི་སྒྲ་སྒྲོགས་མ། །ཕྱག་བཞི་གཡས་ཀྱི་དང་པོ་རལ་གྲི་འཛིན། །འོག་མ་བྷན་དྷ་རཀྟས་དམར་བསྐྱིལ་འཛིན། །གཡོན་གྱི་དང་པོ་ཤག་ཏིའི་མཚོན་ཆ་འཛིན། །
འོག་མ་ཏྲི་ཤུལ་མགུལ་ནས་དར་དཔྱངས་འཕུར། །ཤག་ཏིའི་རལ་གྲིའི་མཚོན་གྱིས་བསད་པ་ཡི། །ལྷ་མ་སྲིན་གྱི་ཐོད་སོགས་དོ་ཤལ་བྱས། །གླང་པོ་ཆེའི་ཀོ་རློན་སྟོད་གཡོག་འཇིགས། །སྨད་ནི་བ་
1-4-64b

གླང་ཀོ་རློན་དྲས་པ་ལ། །ཕྱེད་ནི་ཤམ་བུ་རེ་ལྡེ་སེར་པོར་དཀྲིས། །ཀླུའི་དབང་པོ་བཤིབས་པའི་སྐེ་རགས་ཅན། །ཞབས་གཉིས་ལྕགས་སྒྲོག་དག་གིས་མཛེས་པར་བརྒྱན། །ཁྲག་ཞག་མང་པོའི་ཚོམ་བུར་
བྲིས། །བོང་བུ་ག་ཞོན་མཚན་མོ་དུར་ཁྲོད་རྒྱུ། །བོང་བུའི་རྨིག་པ་གློག་གི་ཤུགས་ཅན་མ། །ཁམས་གསུམ་སྐད་ཅིག་དག་གིས་བསྐོར་བར་བྱེད། །སྐད་ནམ་དུང་དང་འབྲུག་གི་སྒྲ་ལྟ་བུས། །མ་མོ་
མཁའ་འགྲོ་ཤ་ཟ་དབང་དུ་བསྡུད། །ལྷོ་ཕྱོགས་གཤིན་རྗེའི་ཕོ་བྲང་རྟག་ཏུ་གནས། །དམ་པའི་ས་ནས་གཟུགས་སྐུ་གཉིས་གཟིགས་མ། །ཏིང་འཛིན་དབང་ཐོབ་གཟུགས་ཁམས་གནས་སུ་བྱོན། །
ཚངས་པའི་རྒྱལ་པོ་ལ་སོགས་ཕྱག་བྱས་མ། །གཞན་ལ་དབང་བསྒྱུར་འདོད་ཁམས་ཡ་མཐར་ཕྱིན། །དབང་ཕྱུག་ཆེན་པོའི་སྐུ་ལ་དགྱེས་འཁྲིལ་མ། །སུམ་ཅུ་རྩ་གཉིས་ཚལ་བཞིར་བྱོན་པའི་ཚེ། །
ལྷ་རྣམས་དབུགས་དབྱུང་རྒྱ་བྱིན་ཕྱག་བྱས་མ། །ལྷ་མ་ཡིན་རྣམས་ཕུང་པར་བྱས་པའི་ཚེ། །ལྟེ་བའི་ཐད་ཀྱི་ཕྱོགས་ནས་ཉི་ཟླ་འཆར། །རྒྱལ་ཆེན་བཞི་ལ་སོགས་ཀྱིས་ཕྱག་བྱས་མ། །རྒྱ་མཚོའི་
གཏིང་ནས་མེ་འབར་མཚོ་སྐེམས་ནུས། །ས་འོག་དབང་པོ་ཀུན་གྱིས་ཕྱག་བྱས་མ། །ལྷ་མོ་ཁྱོད་ཀྱིས་ཆོ་འཕྲུལ་འདི་བསྟན་པས། །བདུད་དང་གཤིན་རྗེའི་རྒྱལ་པོ་འདར་ཞིང་འདུད། །མ་མོ་སྲིན་
1-4-65a

མོའི་ཚོགས་རྣམས་འདར་ཞིང་རྔམ། །ཙིཏྟ་རིན་ཆེན་གུར་ཕུབ་གཞལ་ཡས་ན། །ཉི་ཟླའི་དཀྱིལ་འཁོར་བརྩེགས་པའི་འོད་ཟེར་འབར། །ཕྱོགས་བཅུའི་འཇིག་རྟེན་དུག་
གི་བཅུད་བསྡུས་ནས། །ཉི་མའི་དཀྱིལ་འཁོར་དག་ལ་ཐིམ་པར་མཛད། །དུག་གི་རླངས་པས་ནག་པོའི་ཕྱོགས་རྣམས་ཀྱིས། །བཞི་བརྒྱ་རྩ་བཞིའི་ནད་རྣམས་སློང་བྱེད་མ། །དེ་ཕྱིར་ནད་ཀྱི་བདག་མོ་
དམ་ལ་འདུད། །ཕྱོགས་བཅུའི་འཇིག་རྟེན་བདུད་རྩིའི་བཅུད་བསྡུས་ནས། །ཟླ་བའི་དཀྱིལ་འཁོར་དག་ལ་ཐིམ་པར་མཛད། །བདུད་རྩིའི་རླངས་པས་དཀར་པོའི་ཕྱོགས་རྣམས་ཀྱི། །བཞི་བརྒྱ་རྩ་
བཞིའི་ནད་རྣམས་རྩད་གཅོད་མ། །བདུད་རྩི་སྨན་གྱི་རྒྱལ་མོ་དམ་ལ་འདུས། །གང་ཞིག་ཁྱོད་ལ་དད་ན་མ་བས་བྱམས། །དེ་ཕྱིར་མ་གཅིག་ནད་བདག་སྨན་གྱི་གཙོ། །ལྷ་མོ་ཁྱོད་ལ་བདག་གིས་རྟག་
ཏུ་བསྟོད། །སངས་རྒྱས་ཤཱཀྱ་ཐུབ་པའི་སྤྱན་སྔར་དུ། །བདག་གིས་དིང་ནས་འཁོར་བ་ཇི་སྲིད་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་སོགས། །ཞི་བར་བྱ་ཞིང་ཚེ་དང་ལོངས་སྤྱོད་འཕེལ། །ནག་
པོའི་ཕྱོགས་ནི་དགུག་ཅིང་དབང་དུ་བསྡུད། །སྨྱོ་འབོག་བསད་པ་ལ་སོགས་ལས་འདི་དག །བསྟན་པ་བསྲུང་ཕྱིར་ལས་འདི་གྲུབ་པར་གྱིས། །འདི་ལས་འགལ་ན་རྒྱལ་བའི་སྐུ་བསླུས་པས། །དུས་གསུམ་
1-4-65b

རྒྱལ་བའི་རྡོ་རྗེས་མགོ་འགོམས་ཤོག །དེ་སྐད་རྒྱལ་བའི་སྤྱན་སྔར་དམ་བཅས་པ། །དམ་བཅས་བཞིན་དུ་འཕྲིན་ལས་མྱུར་དུ་མཛད་དོ། །རྣལ་འབྱོར་བདག་དང་བདག་གི་འཁོར་རྣམས་ལ། །ཞལ་
ནས་བདུད་རྩིའི་ཆར་གྱིས་རྒྱུན་ཕོབ་ལ། །ནད་སོགས་སྡུག་བསྔལ་ཚོགས་རྣམས་ཞི་བར་མཛོད། །ཚེ་དང་དབང་དང་ལོངས་སྤྱོད་རྒྱས་པར་མཛོད། །ཟང་ཟིང་མེ་ཏོག་འབྲས་བུའི་ཕུང་པོ་དང་། །རིན་
ཆེན་རྐང་འགྲོ་ཕྱུགས་རྣམས་འཕེལ་བར་མཛོད། །བླ་མ་སྨོད་ཅིང་དཀོན་མཆོག་དབུ་འཕངས་(འཕང་)སྨོད། །བདག་གི་དགེ་བའི་བར་ཆད་བྱེད་པའི་དགྲ། །ཆེ་གེ་མོ་ཞེས་བྱ་བའི་ལས་ངན་འདི། །ཁྱོད་ཀྱི་ཁོང་
ནས་དུག་གི་རླུང་བུས་ལ། །འདུ་བ་རྣམ་བཞིའི་ནད་ཚོགས་ཁོང་ནས་སློངས། །བག་བཞི་པ་ལ་ལྷུར་ནས་སྡེབས་སུ་ཆུག །དོན་སྙིང་སྣ་ལྔའི་ཁོང་ཁྲག་སྐྱུག་དུ་(ཏུ་)ཆུག །ལས་ངན་འཁོར་བཅས་བྲང་ཆེན་
བརྡུང་དུ་ཆུག །སྨྲེ་སྔགས་ཆེ་ཆེན་གནམ་དུ་བོད་དུ་ཆུག །འཆི་བའི་དུག་མདས་སྨྱོ་འབོག་བསད་དུ་ཆུག །གཅན་ཟན་མཁའ་ལྡིང་ལ་སོགས་ལྟས་ངན་ཕོབ། །བསྟན་པ་བསྲུང་པའི་ལས་འདི་
མྱུར་དུ་མཛོད། །ཨོཾ་རུ་རུ་རོ་རུ་བི་ཏིས་སྟ་བ་ཏོ་སི་ཀ་མ་ལ་རཀྵ་སི་ཧཱུཾ་བྷྱོ། ཆེ་ཆེ་(གེ་)མོ་མ་ར་ཡ་ཕཊ། ཅེས་བཟླས་ཤིང་། དམར་བརླབ་ཅིང་གཏོར་མར་སྦྲེང་ཞིང་བརྒྱ་རྩ་བརྒྱད་དམ་ཡང་ན་ཉི་ཤུ་རྩ་གཅིག་
1-4-66a

བཟླས། གཞན་ཡང་ལྷ་མོའི་གཟུངས་ལ་སོགས་པ་བསྟོད་པ་མཐའ་དག་བྱའོ། །དེས་ན་ལྷ་མོའི་སྦྱོར་བ་ལ་གནས་ནས། ཐམས་ཅད་དོན་ནི་གྲུབ་བྱེད་པའི། །སྙིང་པོའི་
གསང་སྔགས་དམ་པ་འདི། །རྟག་པར་བཟླས་པ་བྱ་བ་སྟེ། །མྱུར་བ་ཡང་ནི་མ་ཡིན་པ། །ཐོགས་པ་ཡང་ནི་མ་ཡིན་པ། །མི་གསལ་བ་ཡང་མ་ཡིན་པ། །གུག་སྐྱེད་ཉམས་པ་མ་ཡིན་པར། །+གཡེང་+
གཡེང་བའི་རྟོག་པ་སྤང་ལ་བཟླས། །ཨོཾ་ཧཱུཾ་ཤྲཱི་ཡ་དེ་བི་ཀ་ལི་ཀཱ་ལི། མཧཱ་ཀ་ལི་ཧཱུཾ་བྷྱོཿ [བསྙེན་པ་ལ་ཧཱུཾ་བྷྱོ་ཡན་བཟླས་ལ། ལས་སྦྱོར་དུས་ཨེ་ཨ་ར་ལི་ཞེས་པ་སྦྱོར།] ཨེ་ཨ་རི་ལ་ཧྲི་ཛ་ཞེས་ཡིག་འབྲུ་གསལ་བ་
ལྷ་མོས་བཟླས་ཏེ། སྔགས་ཀྱི་བཟླས་པ་ཐམས་ཅད་ཀྱང་ལྷ་མོའི་ཚིག་ཡིན་ནོ་བར་ཆེ་[རང་གི་བཟླས་པས། ལྷ་མོ་གཙོ་འཁོར་ཐམས་ཅད་ཀྱིས་བཟླས་པར་བསམ།] བའི་ང་རྒྱལ་བྱ་ཞིང་། རང་གི་སྤྲུལ་པའི་ལྷ་མོ་
ཐམས་ཅད་ཀྱི་ཞལ་ནས་ཀྱང་སྔགས་ཀྱི་སྒྲ་འབྱུང་བར་བསམ་ཞིང་བཟླས་པ་ལ་བརྩོན་པར་བྱས་པ་དེ་ལྟ་བུས་ནི་ཐམས་ཅད་ཀྱི་བཟླས་པར་འགྱུར་རོ། །དེ་ནི་སྔོན་དུ་བསྙེན་པ་བྱ་བའི་སྔགས་ཏེ། འབུམ་
ཕྲག་བདུན་བཟླས་པའམ། ཡང་ན་འབུམ་ཕྲག་གསུམ་དུ་བཟླས་པས་ལས་ཐམས་ཅད་འགྲུབ་བོ། །དེ་ཡང་སྔགས་ཁྲི་ཕྲག་རེ་རེ་བཟླས་ནས་གཏོར་མ་བོར་ཏེ་བཏང་ངོ་། །ཁུ་ཚུར་བཅིངས་འཛུབ་
1-4-66b

མོ་གཉིས་སྦྲེང་ལ། ཁ་འགྲམ་གཡས་གཡོན་དུ་མཆེ་བ་ལྟར་བྱས་ལ། ཨོཾ་བྷྱ་བྷ་ཏ་ལི་བྷ་ཏ་ལི་ཚེ། ཞེས་བདུན་ནམ་གསུམ་བཟླས་ནས་འདི་སྐད་དུ། དུར་ཁྲོད་བདག་པོ་དངོས་གྲུབ་ཞལ། །གཏུམ་ཆེན་
འཇིགས་བྱེད་ཡི་དྭགས་ཁ། །དམ་ཚིག་བསྲུང་མ་ཁྲག་དགའ་མོ། །ཀ་ལིའི་སྒྲ་སྒྲོགས་སྦྱོར་ཟིན་མ། །དུར་ཁྲོད་རོའི་ཚལ་དབུས་སུ། །ཚོགས་དང་ཕོ་ཉར་བཅས་པ་རུ། །གཙིགས་བྱེད་གཏུམ་མོ་དུད་
སོལ་མ། །གསོལ་གཅིག་བཞེས་གཅིག་དམ་ཚིག་ལྷ། །གནས་ནས་གནས་སུ་མཛད་དུ་གསོལ། །བདག་གི་སེམས་ལ་ཅི་འདོད་པ། །དེ་ནི་ཁྱོད་ཀྱིས་གྲུབ་པར་གྱིས། །བདག་གི་ལས་ནི་ཅི་བྱེད་
ཀྱང་། །དེ་ལ་ཀུན་གྱིས་གྲོགས་གྱིས་ཤིག །ཧཱུཾ་གྷྲི་ཧྣ་གྷྲི་ཧྣ་སརྦ་དུཥྜན་བག་ཀྵ་བག་ཀྵ་ཕྲོཾ་ཕྲོཾ་ཕྲོཾ་ཕཊ་སྭཱཧཱ། ཞེས་བརྗོད་དོ། །སེ་གོལ་ལན་གསུམ་གདབས་ཏེ་བཏང་པར་བྱའོ། །འཛབ་མ་རྫོགས་
ཀྱི་བར་དུ་རྒྱུན་དེ་ལྟར་ཤེས་པར་བྱའོ། །ཇི་སྲིད་སྐྱོ་བར་མ་གྱུར་པ་དེ་སྲིད་ཀྱི་བར་དུ་བཟླས་ལ་སྐྱོ་བར་གྱུར་ན་ཡང་བསྟོད་པ་བྱས་ལ། མཆོད་པ་ཕུལ་ཏེ་ཕྱག་བྱས་ལ། ལྷ་མོ་སླར་གཤེགས་སུ་
གསོལ། དཔལ་ལྡན་ལྷ་མོ་ནག་མོ་ལ་སྔོན་དུ་བསྙེན་པ་ཆེན་པོ་ཕུལ་ཞིང་། བསྙེན་པ་རྫོགས་པར་བྱས་ལ། ལྷ་མོས་ལུང་བསྟན་ཞིང་མཚན་མ་ཐོབ་པའི་རྣལ་འབྱོར་པས་ཀྱང་དང་པོ་ཉིད་
1-4-67a

དུ་སྙིང་པོའི་གསང་སྔགས་འབུམ་ཕྲག་གཅིག་བཟླས་ལ། དེ་ནས་བསྟོད་ཅིང་ལས་ལ་སྦྱར་རོ། །དེ་སྨྱོ་ཤིང་གིས་བསད་པའི་ལས་བྱས་ན། གྲོ་མཁར་གྱི་ས་དང་། དུར་ཁྲོད་ཀྱི་
ས་དང་། དུར་ཁྲོད་ཀྱི་ཐལ་བ་དྲོན་མོ་དང་། དུར་ཁྲོད་ཀྱི་སོལ་བ་དང་། རྫས་དེ་དག་ཀུན་གཅིག་ཏུ་བསྲེགས་ཏེ་ཞིབ་དུ་(ཏུ་)བཏགས་ལ། ལུག་བོང་གི་གཅིན་གིས་(གྱིས་)བསྒྲུས་ཏེ་{བཀྲུས་ཏེ}། བསྒྲུབ་བྱའི་གཟུགས་
བརྙན་བྱའོ། །ལྷུམ་བུ་དང་ལྷུམ་བུ་མེད་ན་ལང་ཐང་ཚེའི་འབྲས་བུ་དང་། དུག་དང་སྐྱེ་ཚེ་དང་ལན་ཚྭ་ཁྲག་སྦྱར་བས། མི་དེའི་རིགས་རུས་ཀྱི་བླ་གང་ཡིན་པའི་བླ་གཟུགས་གྲོ་ག་ལ་བྲིས་ལ། བློ་
དེའི་ལུས་ལ་དགྲ་དེའི་མིང་རུས་དང་། སོད་གཅིག་པའི་བསྐུལ་ཚིག་དང་བཅས་པར་བྲིས་ཏེ། འདི་སྐད་དུ། ཧཱུཾ་ཆེ་མོ་མ་ར་ཡ་ཕཊ། ཨུད་མན་ཏཾ་ཀུ་རུ་ཕཊ། ཅེས་བྲིས་ལ་བླ་རྡོ་དང་སྦྲགས་
ལ་གཟུགས་བརྙན་གྱི་སྙིང་ཀར་གཞུག །གཞན་ཡང་གོང་གི་རྫས་དང་ཚྭ་བ་གསུམ་མུ་ཟི་ནག་པོ་བསྲེས་ཏེ། ཞིབ་དུ་(ཏུ་)བཏགས་ནས་བོང་བུའི་གཅིན་དང་སྦྱར་ཏེ། གཟུགས་བརྙན་གྱི་ཀུན་ལ་ཁྱབ་
པར་བསྐུའོ། །དེ་ནས་གཅན་ཟན་གྱི་ཁ་ནང་དུ་བཅུག་ལ། མཎྜལ་གྱི་དབུས་སུ་བཞག །དེ་ནས་གང་ལ་བྱ་བ་དེ་བཀུག་ཅིང་གཟུགས་བརྙན་ལ་བསྟིམ་ཞིང་དེ་ཡིན་པ་ཁོ་ནར་བསམས་ཏེ་དེ་ལ་
1-4-67b

ལས་བྱའོ། །རྒྱ་གར་ཕན་ཆད་ན་མི་གསོད་པའི་གསལ་ཤིང་[སེང་ལྡེང་]རྩེ་གཅིག་པ་ལ་བྱེད་པ་དེ། [ཡང་ན་སོར་བཞི་བཞི་གཤིབས་པའི་ནང་དུ་ཟེར། བར་དེར་ལྷ་མོར་བསྐྱེད་ལ་བསྙེན་པ་བྱའོ། །]འདིར་ལྕགས་ལ་
གསལ་ཤིང་རྩེ་གཅིག་པར་བརྡུངས་ལ་བྱའོ། །བྱས་པའི་ལྷ་མོ་ཡིན་ཏེ། གཟུགས་བརྙན་གྱི་རྐུབ་ནས་གྱེན་དུ་བཙུགས་ཏེ་ཁར་ཕྱུང་སྟེ་གཟུག་གོ། །དེ་ནས་སྔགས་འབུམ་ཕྲག་གསུམ་བཟླས་
ན་དགྲ་བོ་བརླག་པར་འགྱུར་རོ། །དེའི་དབུས་སུ་བསམ་པར་བྱ་བ་ནི། བསྒྲུབ་བྱ་དེའི་སྙིང་གའི་དབུས་སུ། ཡི་གེ་ཀཾ་ལས་གྱུར་པའི་སྡིག་པ་ཁ་དོག་[རྩ་ཐུན་ལ་འབུམ་ཚོ་གཅིག །ཕུར་པ་ལ་གཅིག །དུག་ལ་ཅིག་སྟེ།]
ནག་པོ་མི་སྡུག་པ་ཞིག་གིས། སྙིང་གའི་མར་མེའི་དབུས་སུ་ཞུགས་ནས་སྙིང་ཁྲག་འཐུང་ཞིང་ཤ་ཟ་བར་བསམ་མོ། །གཞན་ཡང་བདག་དཔལ་ལྡན་ལྷ་མོ་ནག་མོར་བསྒོམས་པའི་ཐུགས་ཀའི་མར་མེའི་
ནང་གི་ཧཱུཾ་གི་འོད་ཟེར་ལས་ཛ་དམར་མོ་སྒྲིལ་མ་ཕྱོགས་བཅུར་འཕྲོས་འདུས་པ་ལས། དེ་ཡོངས་སུ་གྱུར་པ་ལས་ལྕགས་ཀྱི་སྤྱང་མོ་རལ་པ་ཅིག་ཏུ་བསྒོམ། དེས་བསྒྲུབ་བྱའི་སྙིང་རྩ་དབུས་མ་ནས་
འཐོན་ནས་ཁྲག་རྔུབས་པར་བསམ་ཞིང་སྔགས་བཟླས་ཏེ། ཨོཾ་ཧཱུཾ་ཤྲི་ཡེ་དེ་བི་ཀཱ་ལི་ཀཱ་ལི་མཧཱ་ཀཱ་ལི་ཧཱུཾ་བྷྱོ། མ་མ་ཤ་ཏྲུཾ། ཨ་མུ་ཀཾ། ཨུད་མན་ཏ། མཱ་ར་ཡ་མཱ་ར་ཡ་ཧཱུཾ་ཧཱུཾ་ཕཊ་ཕཊ། བརྒྱ་
1-4-68a

རྩ་བརྒྱད་བོར་ཏེ་རེ་བཟླས་ནས། རྫས་ནི་ཀ་ན་ཀའི་རྩ་བ་དང་། ཟི་ར་ནག་པོ་དང་། དབང་པོ་ལག་པ་དང་། གནོད་སྦྱིན་གྱི་ལག་པ་དང་། བྱེའུ་རུག་པ་སྐྱེ་བ་དམར་པོ་དང་། དུར་
ཁྲོད་སོལ་བ་དང་། ལན་ཚྭ་བསྲེགས་པའི་ཕྱེ་མ་དེ་རྣམས་ཞིབ་ཏུ་བཏགས་པའི་ཕྱེ་མའི་སྦྱོར་བ་བྱས་ལ། བསྔགས་ནས་གཟུགས་བརྙན་ལ་གདབ། ཕུར་བུ་རྡོ་རྗེ་དྲག་པོ་དམར་ལྷང་ངེ་བསྲེགས་ལ་
སྙིང་ཀར་གདབ། དེ་ནས་གཟུགས་བརྙན་[འདི་འབུམ་ཕྲག་གཅིག་གསུམ་ཀའི་རྣལ་འབྱོར་བདྲེར་ཡན་ཆད་ལས་ལ་སྦྱར་བ་སྦྱིན་བསྲེག་(སྲེག་)ལས་ཀྱི་མཐའ་བསྡུལ་(བསྡུས་)བ་དང་། གསུམ་ལ་བསྲེག་པ་དང་། མནན་པ་དང་འཕང་པའོ། །]མཚོན་
རྣོན་པོས་བཏུབས་ལ་ཕྱེ་མར་བྱས་ལ། སྨྱོ་ཤིང་གི་འབྲས་བུ་ཡོད་ན་རབ། མེད་ན་ལང་ཚོའི་འབྲས་བུས་བརྒྱ་རྩ་བརྒྱད་བླངས་ལ། རྩབས་མོའི་ནང་དུ་བཏགས་ནས་གཟུགས་བརྙན་གྱི་ཕྱེ་མ་དང་
བསྲེས་ལ། དཔལ་ལྡན་ལྷ་མོའི་སྦྱོར་བས་སྐྲ་བཤིག་གཅེར་བུར་ཕུད་ནས་ཁ་ལྷོ་ཕྱོགས་སུ་བལྟས་ཏེ། ཚེར་མའི་མེ་ལ་སྦྱིན་བསྲེག་(སྲེག་)བྱའོ། །དེའི་གསང་སྔགས་ལ། ཨོཾ་ཧཱུཾ་ཤྲི་ཡེ་དེ་བི་ཀཱ་ལི་ཀཱ་ལི་
མཧཱ་ཀཱ་ལི་ཧཱུཾ་བྷྱོ། མ་མ་ཤ་ཏྲུཾ། ཨ་མུ་ཀཾ། མ་ར་ཡ་ཨུད་མན་ཏམ། ཀུ་རུ་ཧཱུཾ་ཕཊ། ཞེས་(ཅེས་)བརྒྱ་རྩ་བརྒྱད་དུ་བཟླས་པ་བྱའོ། །དེ་ལྟར་བྱས་ན་སྨྱོ་ནས་འཆི་བར་འགྱུར་རོ། །ཡང་ཤིང་གི་ཐལ་བ་དེ་ཉིད་
1-4-68b

བླངས་ཏེ་དེ་ཉིད་ཀྱི་སྤྱི་བོར་བཏབ་ན་ལོ་ཉི་ཤུ་རྩ་གཅིག་ཏུ་སྨྱོ་བར་འགྱུར་རོ། །ཞེས་ཀྱང་བཤད་དོ། །གཞན་ཡང་བདག་གི་རྨི་ལྟས་སུ། །བུ་མོ་ནག་མོ་ཁྲོས་པ་ཡིས། །གང་ཞིག་འཆིང་ཞིང་བཅིངས་འགྱུར་ན། །
མཚན་མོ་ནག་མོར་དེ་ཤེས་བྱ། །བསྒྲུབ་བྱ་ཉི་མ་བདུན་ན་ནི། །འཆི་སྟེ་གཤིན་རྗེའི་ཡུལ་དུ་འགྲོ། །གལ་ཏེ་རེ་ཤིག་(ཞིག་)ཅུང་ཟད་འགོར་ན་ཡང་། །ཉིན་ཞག་བདུན་དུ་བསམ་གཏན་འདི་བྱའོ། །བསྒྲུབ་བྱའི་
ལུས་པོ་རིད་པ་སྐམ་པ་མདོག་ཉམས་པ་དྲི་མ་ཅན་སྐྲ་འཛིངས་པ་སྐུམ་པ། ཁུ་བ་རྔུལ་དང་ཁྲག་འཛག་པ། འདར་བའི་ཆ་བྱད་ཅན་གཅིག་མདུན་དུ་བསམ། ཡང་ན་མངོན་སུམ་དུ་བསམ་སྟེ།
བདག་ལྷ་མོར་གནས་པའི་སྙིང་གའི་ཧཱུཾ་ལས་འོད་ཟེར་ཉིད་(ཉི་)ཟེར་དང་མེ་སྟག་ལྟ་བུ་བྱུང་བ་ལས། བསྐལ་པའི་མེ་བཞིན་དུ་འབར་ཞིང་། འུར་སྒྲ་དང་ཏོག་ཏོག་དང་ཆེམ་ཆེམ་ཅན་དུ་གྲགས་པའི་ཡི་གེ་
ཧཱུཾ་དུ་གྱུར་ཏེ། ཧཱུཾ་དེ་ལས་རྡོ་རྗེ་འབར་བའི་ཁབ་དུ་(ཏུ་)གྱུར་པར་བསམ། རྡོ་རྗེ་འབར་བའི་ཁབ་དེ་དགྲ་བོའི་གཤང་(བཤང་)ཁའི་སྒོར་ཞུགས་ཏེ། སྙིང་ཕུག་ནས་ཁའི་ནང་ངམ། སྤྱི་བོ་ཚངས་པའི་བུ་ཁར་ཕྱུང་
ནས་ཆེར་འབར་བར་བསམ་སྟེ། སྙིང་པོའི་སྔགས་ཀྱི་འཇུག་(མཇུག་)ལ་ཆེ་གེ་མོ་ཧ་ན་ཧ་ན་དྷ་ཧ་དྷ་ཧ་ཧཱུཾ་ཧཱུཾ་ཕཊ་ཕཊ་ཁ་སྦུབ་དུ་(ཏུ་)ལྟུང་བར་བྱའོ། །དེ་ལྟ་བུའི་བསམ་གཏན་གྱི་ལྷ་ཆེན་པོ་ཡང་འཆི་ན། འོན་ཀྱང་
1-4-69a

འཁོར་བ་ལ་གནས་པའི་མི་ལྟ་སྨོས་ཀྱང་ཅི་དགོས། དཔལ་ལྷ་མོ་ནག་མོའི་སྒྲུབ་ཐབས། ལོ་ག་ཤྲིས་བསྒྱུར་བའོ། །གྷུ་ཧྱ།། །།


目录
བཀའ་སྲུང་དུད་སྲོལ་ལྷ་མོའི་ཤོག་རིལ།